كل واحد يكتب موقف حصل معاه

وانا ايضا لي عوده ان شاء الله ... مواقف بتضحك هههه

حلو كتير الموضوع عندي موقف مؤلم والله شوي صار بأول أيام الحرب

برجع أكتبه إن شاء الله بس أخلص تسجيل للجامعة لإني مشغولة شوي هلاء

يسلمو جلنار ع الموضوع المميز

طيب أنا هلاء رجعت

إليكم الموقف

هلاء أول يوم بالحرب السبت 27/12/2008 كان عندي إمتحان معمل فيزياء A ورحت يوم الثلاثاء 23/12/2008على مبنى المختبرات إمشان أشوف الموعد وكان من 9-11 وطبعا يوم الأربعاء والخميس والجمعة مارحت على الجامعة ولما إجا يوم السبت صبحت من الصبح ع الجامعة على أساس إنه إمتحاني من 9-11 فكنت على 8:15 بالزبط بالجامعة ورحت لأشوف أماكن القاعات يلي راح نقدم فيها الامتحان وتفاجئت إنه الموعد متغير وصاير من 12-2 هلاء معي 4 ساعات تقريبا وما فيني أروح ع البيت لإنه بدي ساعة إلا ربع تقريبا بالسيارة وأنا مروحة وساعة إلا ربع وانا راجعة تاني يعني راح ضيع الوقت بالمواصلات فرحت على مبنى المكتبة المركزية أراجع فيها المادة كمان مرة وعلى الساعة 11 تقريبا كنت مخلصة دراسة تماما ومابعرف شو أعمل فضليت بالمكتبة وقعدت على جهازكمبيوتر وفي تمام الساعة 11:20 بالزبط اهتز مبنى المكتبة هزة قوية كتير ما توقعت أبدا بهديك اللحظة إنه ممكن يكون حرب ولا حتى خطر ببالي بالأول فكرت إنه تفريغ هواء يعني مو لهدرجة صوت التفريغ عالي بس هيك أول شي خطرلي
هلاء إجوا أمن الجامعة على المكتبة لحتى ينزلونا من المكتبة ولما نزلت شفت بغرفة الأمانات صحباتي وطلعنا مع بعض وكانت كل الباصات أخدت البنات وروحوا وما ضل غيرنا يلي كنا بالمكتبة لإنه تأخرنا ونحنا بنجيب بالشنط
وطبعا طلعونا من الجامعة لإنه الجامعة مهددة بالقصف وماحدا لازم يضل فيها أبدا وماعرفنا وين بدنا نروح كل الأماكن المحيطة بالجامعة مهددة "مجمع الوزارات والسرايا والجوازات كانت مقصوفة بهديك اللحظة " فاتجهنا للسرايا إمشان ناخد سيارة من هونيك
كانوا كل صحباتي يلي معي من معسكر وانا من معسكر تاني وكنا كتار وفجأة شفت صحبيتي من نفس المكان يلي بعيش فيه فودعت صحباتي ع أساس إنه احتمال ما نشوف بعض تاني ورحت مع صحبيتي ع معهد الوكالة "وياااااااااريتني ما رحت " هلاء انا ضليت أحاول أتصل ع ماما إمشان أطمنها علي وأحكيلها ما تخلي أختي تطلع لإنه مافي امتحانات وبطلوع الروح لما لقط الخط معي وكلمتها وكانت أختي طالعة بس الحمد لله رجعت بالباصات بالسلامة
ضلينا نستنى بمعهد الوكالة وكل الباصات طلعت على كل المحافظات ماعدا على المغازي وجباليا وبعد شوي طلعنا برة المعهد نستنا لإنه فرفطت روحنا ونحنا عم نستنى من 11:30 -1:30 تقريبا ولما كنا برة إجا باش مهندس إسمه أحمد الحلبي "الله يرحمه " وحكالنا يابنات معلشي فوتي جوا المعهد أحسن وأأمن إلكم وكنا طبعا شباب وصبايا برة رحنا انا وصحبيتي فتنا المعهد وبعد 3 دقايق تقريبا المكان يلي كنا واقفين فيه انقصف
واستشهدوا 8 أطفال وشاب والباش مهندس
المهندس بالأول ماكان مستشهد حملوه الشباب جوا المعهد وكان صدره بينزف وبيطلع من فمه دم وكان الدم غزير جدا وطالما طلع من فمه يعني عندو نزيف داخلي ولو لحقوه بسرعة ممكن يعيش بس للأسف مالحقوه وضل رافع أصبع السبابة وبيحكي لا إله إلا الله للنفس الأخير وكل هاد كان قدامي انا وصحبيتي أنا وإياها انصعقنا بالمنظر ماعرفت شو أعمل ماقدرت أصرغ ولا قدرت أبكي حسيت الدموع تجمدت بعيوني ووقفت مصدومة وما حكيت ولا كلمة وبعديها مباشرة إجا باص ونقلنا على بيوتنا

بعد هاد الموقف عرفت أديش الموت قريب من الإنسان يعني لو تأخرنا شوي كان كنا مكانه للباش مهندس"رحمة الله عليه " بس عنجد أنا مريت بمواقف صعبة بس أصعب من هاد الموقف مامريت طول حياتي