الطريق الى القدس (2)

السلام عليكم

اتمنى ان تكونوا بتمام الصحه والعافيه اخواني الكرام
في هذا الموضوع حبيت بس اطلعكم على بعض تفاصيل رحلتنا الى المسجد الاقصى المبارك
وفي غالب الاحيان بتكون مغامرات وفيها مخاطره شوي

نبدأ كما بدأنا في تفاصيل الرحله اللي قبل هذه من باب التعريف فقط

في الوضع الطبيعي تحتاج الرحله من الخليل الى القدس تقريبا ساعه .. لكن بفعل الاحتلال تحتاج الى وقت مفتوح وحسب التسهيلات والوضع ... ويمضي بعض الشباب ساعات حتى يتمكنوا من الدخول

في رحلتنا هذه الحمد لله استغرقت معنا حوالي ساعه وثلث فقط ... طبعا كل مره كنا نروح مع شباب معينين لكن المره هذه كنت انا لحالي من المجموعه ولكن شباب ثانيين بس من نفس الشله ههههههه وفي منهم لأول مره دخل الاقصى
خرجنا من الخليل ودخلنا في الطريق الالتفافي او خط 60 كما يسمى واقتربنا من طريق مستوطنة كريات اربع وكانت الطريق كلها حواجر للجيش الاسرائيلي وكان الوضع متوتر شوي وخصوصا بعد عمليه الخليل .... بحكي للشباب الله يستر شكله الوضع مش تمام .. بس كان عندنا امل انه رح نصل القدس

طيب هلا نزلنا من السياره الاولى ولكنا في ارض الضفه لسه لكن عند المنطقه الفاصله بين الضفه والارض المحتله .... هلا انا كنت بعمل اتصالاتي مع السائق اللي بده يلاقينا في المنطقه المقابله وبحكيلي يلا تعالوا وانا بنتظركم
هلا قبل نصل لمكان السياره الثانيه في الارض المحتله بدنا نقطع مسافة 500 متر تقريبا مشيا او ركضاً وبسرعه لأنه احيانا بكون الجيش عامل فيها كمين وكمان في مستوطنه مقابلها وبتكون الشرطه واقفه على البوابه وكمان في قريب منها كثير في حاجز او معبر والجيش كثير التواجد فيها لكن هي اريح منطقه للدخول

هلا تقريبا وصلنا للسياج الفاصل وكنت عم بحكي مع السائق الا هو قدامي فدخلنا السياج من فتحه وهذه الفتحه تدخلنا الى جانب محطه للوقود والسياره تنتظر فينا هناك عند المحطه وكنا ثلاث شباب ... فلما شافنا السائق حكالنا اقعدوا هون دقائق لأنه في كمان شباب جايين وراكم عشان نكمل حمولة السياره وقعدنا على كرسي خشبي تقريبا عشرين ثانيه فقط

نظرت الى الجهة اليسرى affraid

وإذا بجيب الجيش داخل علينا وما في مجال للهروب وضل يمشي لحتى وصلني ... فتح الباب وحكالي تعال 1032

انا قلت خلاص رح نتبهدل .... ما رديت عليه في الاول خليت حالي مش سامع ههههههههههههه فهلا هو عصب ورفع صوته عليه وحكالي (بوووو ) يعني تعال ونزلوا الجنود من الجب فرحت انا لأنه ما في مجال خلاص ...
حكالي الجندي وين التصريح ؟؟؟ حكيتله ما في معي >>> حكالي اعطيني هويتك .. اعطيته الهويه ونادى على الشاب الثاني ونفس الشي حكاله .. والشاب الثالث اللي كان معنا تخبى ورى السياره وما شفوه

هلا انا قلت بنفسي خلص يا سجن يا بهدله وحجز عدة ساعات
لكن الحمد لله الجندي الله اعمى قلبه واعطاني الهويه وحكالي انا والشاب اللي معي اسبقنوني على الحاجز >>>> والله الجنود ركبوا في الجيب ونحنا خلينا حالنا رايحين للحاجز وقعد يلف في الجيب وتخبينا في مخزن صغير قريب لمحطه الوقود هههههههههه
هم فكروانا رحنا للحاجز
ولما وصلوا الحاجز ما لقونا حلو

والله بعثلنا كمان شباب اثنين وكملنا حمولة السياره وهي من نوع (Ford Focus 2010) وانا بحكي للسائق يلا مشان الله بسرعه قبل ما يرجعوا ... وركبنا وتوكلنا على الله ومشت السياره ... ومجرد ما تمشي السياره تقريبا الخطر بزول
طبعا الزجاج الخلفي معتم عشان لو مرينا عن شرطه ما يشوفونا لأنه بعرفونا من الضفه هههههههه
طبعا الشباب المقدسيين اللي بنركب معهم بكونوا مجموعه... وأحدهم بكون ماشي امام السياره اللي راكبين فيها بس ما بكون معه حد وبكون على اتصال مفتوح وبكون بعيد عنا حوالي كيلو متر عشان لو في حاجز شرطه يحكي للسائق اللي مركبنا ارجع في حاجز او شرطه او بحكيله غير الطريق وهيك صعب ننمسك

لما قربنا ننزل كانت الشرطه منتشره بشكل غير طبيعي ... نزلنا من السياره وماشيين طبعا إلا سيارتين شرطه ورانا .. حكيت للشباب ما يلتخم ويتوتر هههه خليكم عاديين ولا تنظروا وراكم >>>> والحمد لله مشى الوضع ووصلنا لعند باب العامود ودخلنا البلده القديمه وقربنا لباب الاقصى وهناك في البلده القديمه بكون في شرطه كمان واقفين على الابواب
ونحنا بنكون ماشيين وايدينا على قلوبنا ليوقفونا وننمسك في اخر عشر امتار للأقصى
ولاحظت شرطي بغمز في الشرطي الثاني علينا الطريق الى القدس (2) 582643

صار قلبي يخبط خبط ههههههه وقلت لو بطخوني ما بقف وشديت في مشيتي وكيف رجلي دخلت ساحات الاقصى تشاهدت وقلت الحمد لله رب العاليمن لأنه خلاص من دخل الساحات فلا خوف عليه

والحمد لله احيينا ليلة القدر هناك وكانت اجواء روحانيه جداً وتمتعنا بالتجول هنا وهناك لكن والله ان القلوب تحزن على حال القدس والاقصى وقد لفة الاستطان والاحتلال من كل الجوانب

نسأل الله ان يرجع للأقصى والقدس سالف عزهما ومجدهما وان تحرر من كيد الغاصبين
ونسأله تعالى ان يكحل عيونكم برؤية الاقصى وهو محرر ويرزقكم فيه صلاة قبل الممات

( إعذورني في الاخير سردت الأحداث بشكل سريع لنه والله تعبان ومريض وعي رشح وفلونزه وميكل هوا وما قدرت اكمل )
وان شاء الله الصور والفيديو لاحقاً

حمد الله ع السلام ياا زعيم...

الحمد انكم روحتو ورجعتو يسلامة ( عقبالنا يا ربي بالزيااارة ان شاء الله)

تعبان ومريض وعي رشح وفلونزه وميكل هوا وما قدرت اكمل

الله يشفيك وماا تشوف شر ابدا يااربي..

طهورا ان شاء الله

الف الحمد لله ع السلامة اخي احمد

الله يشفيك اخي احمد ان شاء الله تقوم احسن من الاول.

الحمد لله انكم بلغت مقصدكم و صليت في الاقصى تقبل الله منكم.

محتار

على فكرة دعيت معنا و لا نستنا؟

ماشاء الله عليكم مغامرين بقوووووووه

بس شجعان >>لاتصدقون ههه

رحله رائعه وخصوصا انها للمسجد الاقصى

الله يتقبل منكم يارب

عقبالنا

...

الله يشفيك أخي أ حمد
نفس الشعور

أجر وعافية ان شاء الله

ما شاء الله مغامة حلوة
ان شاء الله كل خطوة فيها حسنة الك أخي

الله يرزقنا ونزور الاقصى متل ما زرتها
ويتقبل طاعات الجميع باذن الله

الحمد الله على سلامتكم

واهم شيء انكم وصلتوو الى هدفكم ربي يحفظكم

Smile

عنجد يعطيكم الف عافيه
والله من وقت يلي قرأت الموضوع تاع الرحله السابقه وأنا بستنا رحلتكم هاي 1041

وبتعجبني كتير طريقتك بسرد القصه
هلأ مشان
.
.
.

الأقصى الحزين كتب:: نظرت الى الجهة اليسرى وإذا بجيب الجيش داخل علينا وما في مجال للهروب وضل يمشي لحتى وصلني ... فتح الباب وحكالي تعال انا قلت خلاص رح نتبهدل .... ما رديت عليه في الاول خليت حالي مش سامع ههههههههههههه فهلا هو عصب ورفع صوته عليه وحكالي (بوووو ) يعني تعال ونزلوا الجنود من الجب فرحت انا لأنه ما في مجال خلاص ...
حكالي الجندي وين التصريح ؟؟؟ حكيتله ما في معي >>> حكالي اعطيني هويتك .. اعطيته الهويه ونادى على الشاب الثاني ونفس الشي حكاله .. والشاب الثالث اللي كان معنا تخبى ورى السياره وما شفوه

هلا انا قلت بنفسي خلص يا سجن يا بهدله وحجز عدة ساعات
لكن الحمد لله الجندي الله اعمى قلبه واعطاني الهويه وحكالي انا والشاب اللي معي اسبقنوني على الحاجز >>>>

عنجد الله ستر ... الله يحميكم ويعمي عيونهم عنكم و عن كل اخواننا عطول يااارب
و الله شوقتونا كتير نشوف الاقصى...نيالكم .. بس ان شاء الله تصيرو تدخلوه بلا كل عالصعوبات
و الله يرزقنا نصلي فيه
تحياتي

» الطريق الى القدس ....
» رفيق الطريق
» طفل على قارعة الطريق...
» القدس رغم الاحزان
» الامل الرائع امام الطريق المسدود