شاب يصف حياته اليومية في غزة في اليوم العشرين من القصف

هاد النص كتبه شب مدني من غزة بيوصف فيه حياته اليومية ، يمكن مكتوب بصيغة مزح بس بتضل حقيقة الحصار و الخوف و الموت ظاهرة من كل كلمة فيه

مكتوب بلهجة غزاوية بسيطة
في دليل على الصمود رغم كل شي

اقرؤو ... اضحكو شوي .. و ابكو شوي .. مو شر البلية ما يضحك ؟؟

وما تنسو أهل غزة من دعائكم
هاد اللي كتبه الشب الغازاوي:
اليوم العشرين.. وليلة من قاع الكيلة..

واجا اليوم العشرين..
وكل يوم بنقول هادة أقوى يوم.. وأعنف يوم ..
لا بس بجد.. اليوم أعنف وأقوى يوم شفناه..
كنا نشوف أغلب القصف على التلفزيون .. هلقيت صار قدامنا مباشر..

طول الليل الدنيا تضوي وتطفي.. زي الألعاب النارية..
بس العالم الألعاب النارية عندها من الأرض للسما.. إلا في غزة.. من السما للأرض..

هيهم وصلوا تل الهوى.. يعني بشيكل بكونوا عنا.. مش بشيكل ونص حتى..

أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين اني قاعد عالنت.. على أساس إنو الدنيا حرب لازم أضل قاعد ألطم..

تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار..

مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..
ما علينا.. الحلو في الموضوع انه شلومو بتبين حنيته في وقت الحرب ..

بقولك حفاظاً على رفاهية الشعب.. اعطونا تلت ساعات تهدئة في اليوم..

الواحد يعمل فيهم اللي بده اياه..
وأحلى ما فيهم انهم مشكلين..
يوم من الوحدة للأربعة..

ويوم من التمنية للحدعش..
ويوم من العشرة للوحدة..

وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..

والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..

اليوم قعدت أفكر أفكر ايش أعمل..
لقيت احسن اشي أعمله اني أنام..
عشان الجو بكون هدوء وفش صوت قصف (نسبياً) ..
لأنه طول الليل صوت القصف وصوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح..

طول ما الواحد قاعد وهوة بسمع يا صوت صاروخ قريب.. يا بعيد..
يا بحس بهزة..
وبدينا نسمع مناطق غريبة صاروا يقصفوها..
مرة مقبرة..
ومرة صالة أفراح..
ومرة عمارة سكنية..
ومرة دار مهجورة..
أو بقصفوا مكان قصفوه قبل هيك (للتأكيد)..
طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده..
شايفين الإنسانية لوين..
وبتقولوا عنهم عاطلين..
يعني اللي ما بصيده الصاروخ الأول..
معاه خمس دقايق ينفد بجلده قبل ما يجيب أجله الصاروخ التاني..

الأعمار بيد الله..
الواحد عنده يقين انه كل شي بأمر الله..
عالرغم بإنه الواحد بطل يخاف زي أول لما يسمع صوت صاروخ..

بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..

دايما بحاول أواسي حالي بالمقولة اللي بتقول "متخفش من صوت الرصاص..

لأنه الرصاصة اللي حتقتلك مش حتسمع صوتها"..
بس هالمقولة بتنطبقش عالصواريخ..
ولا ايش رأيكم..؟
أكتر اشي بكيف عليه لما يرن تلفون الدار..
بنصير نتقاتل مين يرد عالتلفون أنا واخواتي..
عشان نحكي مع الناس اللي بتصلوا من الدول العربية..
كل واحد وحظه..
يطلع الإتصال من المغرب..
الجزائر..
مصر..
ليبيا..
السعودية..
السودان..
اليمن..

أو يتخوزق ويطلعله واحد بقولك جيش الدفاع الاسرائيلي..
ويطلع الشب بحزرك انه يكون عندك سلاح.. أو تتعامل مع واحد من المقاومة..

بس اليوم حسيت انه فش إلا تلفونا بكل غزة.. مسكتش وهوة يرن..
- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..
هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..
ويا الله لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون ..
وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..
بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..

طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل الميا..
أول ما أفتح عنيا على طول بمارس الرياضة اليومية.. بطلع على سطح الدار بتفقد البراميل.. وقديش ضايل ميا.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه..

أنا لقيت حالي لهلقيت عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..
إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..
ولو ضل معكم وقت.. إدعولي أصير غني..

ونشوفكم على خير

منقووووووووول

الله يسعدوا ويسعد كل الشعب الفلسطيني ويصبرهم ويثبتهم
فعلا الشعب ما فقد روح الفكاهة اكبر دليل عندي بنت حماس الله يسعدها يا رب وين ما راحت ووين ما اجت

شكرا قسامية للموضوع الكثيييييييييييييييير حلو يعطيك العافية

اللهم آمين
مشكورة قمر على المرور العطر

هههههههههههههههههههههههههه

بالظاهر خيو اللي كتب القصة كتبها المغرب

لانو بنفس اليوم بالليل

ركب واحد من الطيارين طيارته ال اف16 وحسب تحليلاتي انو اول مرة يركب طيارة

لانو كان فرحان على حاله كتير
وبيذكرني في ابن اختي الصغير لما اشترى البسكليت وضل راكب عليه طول اليوم

والاخ الحنين ابو قلب رهيف

اخد القطاع مشوار من الشمال للجنوب ومن الجنوب للشمال

بيرمي صواريخ .......... زي بابا نويل بالزبط لما يرمي الهدايا بالكرسمس

والنكتة انو بنفس اليوم
ضرب صاروخ جنب البيت فهز باب الغرفة قامت بنت اختي الصغيرة بتحكي: اتفضل

بتفكر فيه حدا ع الباب

بعدين ضرب صاروخ تاني وراه على طول

حكتله : إذا ما دخلت باقوملك بالشبشب

خخخخخخخخخخخخخخخخخخخخخخخ

مشكورة أختي الحبيبة على المرور الرائع
والله يخلي أولاد أختك

هههههههههه قصة حلوة
انا بذكر يوم اتصلت على واحد بس هو ما صدقني قال اني اسرائيلي وغلق التلفون خخخخ
مواقف كثيرة حصلت وانا اتصل بكثير منهم

يكون الواحد يبي يضحك ويبي يبكي يعني الاثنين عم بيصارعوا

الله يرحم شهدائينا ويعين اخواننا في غزة على تحمل الجراح

آمين،،مشكور على أخوي الحنش

كان الله بعونهم وثبتهم

ونسأله تعال أن يرحم شهدائهم وأن يشفي جرحاهم

إسمحيلي أخت قساميه أن أشكر أختنا بنت حماس على تعليقها

وكذلك الشكر لكِ أخت قساميه على القصه الفكاهيه رغم الالم اللي بتحمله

شكرا ع القصه

معلش يا حنش معذورين هما برضوا

الاقصى الحزين
اللهم آمين،،لاشكر على واجب
وزي ماحكا واحد من تعون غزة *إحنا لوضلينا زعلانيين وبنعيط مابنعيش* وهي هيك الحياة فيها حزن وفيها فرح والله يجعل أيامنا وأيام كل المسلمين أيام فرح وهادي الايام ماحتيجي إلا بتحرير فلسطين...

المهندس
لاشكر على واجب،،مشكور على المرور

اللهم ثبتهم وانصرهم

مشكورة اختي قسامية

آمين...
مشكورة على المرور العطر أختي الحبيبة سوار

» حماس في عامها العشرين
» كل منا تألم في حياته
» العدو يعترف بإصابة عشرة صهاينة في"سديروت" .. و"القسام" تواصل القصف
» ارقى ما يتعلمه الانسان في حياته....
» آخر أخبار اليوم